Kjo është një nga ëmbëlsirat dimërore më të përshtatshme për këtë periudhë ku në çdo banke të merkatës kemi gështenja me bollëk.
Një recetë e parë diku në internet mbi një tortë me shtresa më dha këtë frymëzim për të përgatitur sot një ëmbëlsire me jo shumë mundim.
Kur pashë në kuzhine gështenjat, mendova "Pse jo?" .
Rezultati është më shumë se perfekt.
Provojeni e më dërgoni opinionet tuaja.
Vezët e sheqeri rrihen për 10 Minuta deri sa të bëhen shkumë. Më pas shtohet mielli i gështenjave, kakao dhe soda e bukës duke i përziere me lugë në mënyre delikate.
Masën e krijuar e shtrojmë në një tepsi të veshur me letër furre dhe e pjekim në furrë të para ngrohur me 220°C për 7 Minuta
Pasi të jetë pjekur e përmbysim në një terren pune. E mbulojmë me letër furre dhe e rrotullojmë duke i dhënë formën e cilindrit.
Pas pak minutash e hapim dhe e lëmë të ftohet.
Ndërkohë që baza të ftohet mirë në një tas hedhim panën dhe e rrahim deri sa të formohet një shkumë e bardhe. Lyejmë bazën tonë me një shtresë kremi gështenjash e sipër një shtresë pana.
Më pas e rrotullojmë me shumë kujdes rreth vetes duke i dhënë formën e cilindrit. E mbështjellim me letrën e furrës dhe e lëmë të pushojë në frigorifer për 2-3 Orë.
Para se ta shërbejmë e zbukurojmë duke i hedhur sipër pak sheqer pluhur.